उपासाचे थालीपीठ रेसिपी

भाजणीसाठी (अंदाजे ७ कप भाजणीसाठी):

1. जिरे गडद रंगाचे होईपर्यंत भाजून घ्या व बारीक दळून त्याची मिक्सर मध्ये पूड करून घ्या. पूड मिक्सर मधेच राहू द्या.
   
2. राजगिरा किंचित गुलाबी रंगावर भाजून, तो ही जिऱ्याची पूड असलेल्या मिक्सर मध्ये काढून घ्या.
   
3. साबूदाणा ही किंचित गुलाबी रंगावर भाजून घ्या व त्याच मिक्सर मध्ये काढा.
   
4. वऱ्याचे तांदूळ गुलाबी रंगावर भाजून त्याच मिक्सर मध्ये काढा.
   
5. भाजलेले मिक्सर मधील सर्व पदार्थ गार झाल्यावर त्याचे अगदी बारीक पीठ, म्हणजेच 'भाजणी' दळून घ्या.
   
6. उपासाची भाजणी लगेच वापरायला तयार आहे. लगेच वापरायची नसल्यास ही भाजणी फ्रीज मध्ये बरेच महिने सुद्धा टिकेल.

थालीपीठ बनवायची कृति:

1. १ & १/२ कप भाजणी एका तसराळ्यात काढून घ्या.
2. उकडलेला बटाटा कुस्करून भाजणीत मिसळा.
3. त्यात मीठ, तिखट किंवा मिरची, दाण्याचे कूट, कोथिंबीर, व जिरे घाला.
   
4. सर्व मिसळून, लागेल तसे पाणी घालून, कणके प्रमाणे  मऊ मळून घ्या.
   
5. तवा गरम करायला ठेवा.
6. कृतिक्रमांक ४ मधे तयार केलेल्या पिठाचा एक छोटा गोळा घेऊन, हाताने थापून एका पार्चमेन्ट पेपर वर त्याचे गोल थालीपीठ थापून घ्या.
   
7. त्यावर एका बोटाने ४-५ भोके पाडून घ्या.
   
8. आता पार्चमेन्ट पेपर उलटा करून थालीपीठ अलगद हातावर काढून घ्या.
   
9. आणि गरम तव्यावर  टाका.
   
10. प्रत्येक भोकांत व थालिपीठाच्या कडेने थोडे थोडे तेल सोडा.
    
11. झाकण ठेऊन, थालिपीठाच्या खालच्या बाजूवर किंचित गुलाबी डाग दिसे पर्यंत, थालीपीठ मध्यम आचेवर शिजू द्या.
    
12. आता उलतन्याने थालीपीठ उलटून टाका.
    
13. परत थोडे थोडे तेल भोकात व कडेने सोडा व थालिपीठाची दुसरी बाजू ही गुलाबीसर दिसेपर्यंत भाजा.
    
14. तव्यावरून काढून तयार उपासाचे थालीपीठ उपासाच्या लोणच्याबरोबर व दह्याबरोबर वाढा.
    
15. अश्याच पद्धतीने उरलेल्या सर्व पिठाची ही थालीपीठे करून घ्या.