कडबू रेसिपी

कडबूच्या कव्हर साठी :

1. कणकेत मीठ व तेल मिसळून घ्या.
2. हळू हळू पाणी घालत पुरीच्या कणके प्रमाणे थोडी घट्टसर कणीक भिजवून घ्या व १०-१५ मिनिटांसाठी झाकून ठेवा.
3. भिजविलेल्या कणकेचे एक ते दीड इंच मोठे भाग करून घ्या व प्रत्येक भाग हातानी गोल फिरवून चपटा करून घ्या.

कडबूच्या सारणासाठी  :

1. हरभऱ्याची डाळ पाण्याने एक दोनदा धुऊन पाणी काढून टाका.
2. त्यात २ कप पाणी घालून प्रेशर कुकर मधे  तीन शिट्ट्या येईपर्यंत शिजवून घ्या. तीन शिट्ट्या आल्यावर पाच मिनिटांसाठी गॅस बारीक करा आणि पाच मिनिटांनी बंद करा.
3. कुकर गार झाल्यावर शिजलेली डाळ बाहेर काढून घ्या.
4. डाळीवर राहिलेलं पाणी सावकाश ओतून बाजूला काढून ठेवा. (हे पाणी म्हणजेच 'कट', तुम्ही 'कटाची आमटी' साठी वापरु शकता.
5. शिजलेल्या डाळीत गूळ व खोबरं मिसळून गॅसवर किंवा मायक्रोवेव मधे घट्ट होईपर्यंत शिजवून घ्या. मधे मधे हालवात रहा. (मायक्रोवेव मधे शिजविल्याने खाली लागायची  भिती रहात नाही.  मी मायक्रोवेव मधे १-२ वेळा मधे हालवत १० मिनिटे शिजविले. गॅसवर  शिजविल्यास गॅस बारीक ठेवावा व मधे मधे हालावत रहावे.)
6. वरील पुरण  हाताने गोळा करता येण्यासारखे झाले की त्यात खसखस, काजू, बेदाणे, वेलदोड्याची पूड व जायफळ पावडर घालून मिसळून घ्या.
7. हे सारण गार होण्यासाठी ठेऊन द्या.

पुढील कृति :

1. कणकेचा एक भाग घेऊन त्याची एक बाजू खसखसशीत दाबून घ्या.
2. आता त्याची पातळ पुरी लाटून घ्या.
3. पुरीच्या खसखस न लावलेल्या बाजूच्या मधोमध साधारण दीड टेबलस्पून सारण ठेऊन,  करंजी प्रमाणे पुरी अर्धी दुमडून सगळीकडून बंद करून घ्या. ( खसखस लावलेली बाजू कडबूच्या बाहेरच्या बाजूला आली पाहिजे.
4. कडा दाबून बंद करा व कातून घ्या किंवा मुरड घाला.
5. २-४ कडबू तयार झाले की तळायला सुरवात करायला हरकत नाही.
6. गरम तेलात किंवा तुपात बारीक ते मध्यम आचेवर  सगळे कडबू सोनेरी रंगाचे होईपर्यंत तळून घ्या.
7. गार झाल्यावर एका हवाबंद डब्यात भरून ठेवा.  हे कडबुू २-४ दिवस छान टिकतील.